Gipadayag ni Philippine Coast Guard kon PCG Spokesperson for the West Philippine Sea Rear Admiral Roy Vincent Trinidad, kagahapong adlawa nga ang gikaingong mga espionage activities sa tulo ka mga Filipino alang sa China tungod sa dagkong mga suhol, lakip na ang taas nga sweldo ug dagkong bonus gikan sa gikaingong Chinese handler.
Matud ni Trinidad, upat ngadto sa unom ka numero ang kita sa mga suspek sa gihatag nga impormasyon, ug nakadawat usab kini og dagkong mga bonus.
Nasayran nga gipadala matud pa niini ang mga bayad pinaagi sa digital wallet o food courier bugti sa gihatag nga impormasyon.
Usa sa mga espiya gikaingong nakonsensya sa dihang nakakita sa barko sa China nga nibangga sa usa ka barko sa PCG, diin pipila ka mga tripulante niini ang nangaangol.
Dugang usab ni Trinidad, nga usa ka opisyal sa navy ang nagtaho sa pagsulay sa pagrekrut sa usa ka langyaw nga babaye ug nagsugod kini sa pagpangayo og sensitibo nga impormasyon.
Sumala pa sa PCG, nagkanayon usab nga ang pagrecruitment sa mga Filipino sa navy dungan sa pagkadiskubre sa gikaingong Chinese espionage activities lakip na ang Alice Guo case, ang “Palawan 5” nga nagbutang ug CCTV sa palibot sa Ulugan Bay, ug ang mga nadakpan sa Grande Island ug Chiquita Island.
Base sa National Security Council kon NSC, nahunong na ang operasyon sa mga suspek, ug ang tanang Pinoy nga nalambigit giila niini human madiskubre ang sekretong komunikasyon gamit ang gaming app.
Sa laing bahin, hugot nga gipanghimakak sa Chinese Embassy sa Manila ang mga pasangil nga nang-recruit ang China og mga Filipino aron mohimo og espionage activities sa Pilipinas.
Matud sa tigpamaba sa Embassy nga si Ji Lingpeng, ang mga alegasyon pulos hinimo-himo. Giinsistir usab niini nga gisunod sa China ang prinsipyo niini nga dili pagpanghilabot sa internal nga kalihokan sa ubang mga nasud.