Gilarot sa kapulisan ang kapin 1,000 ka punoan sa ilegal nga marijuana nga nagkantidad og P200,000 sa Sitio Katablaran, Barangay Kanaga-an, Cabanglasan, sayong buntag sa Pebrero 28, 2026, isip kabahin sa padayon nga kampanya batok sa ilegal nga droga sa probinsya.
Sumala kang PCpt. Sheila Joy P. Jangad, tigpamaba sa Bukidnon Police Provincial Office, nahitabo ang marijuana eradication operation alas 6:30 sa buntag diin na-uproot ang tanom sa gilapdon nga kapin 500 square meters.
Nakompiska sa mga otoridad ang kapin 1,000 ka fully grown marijuana hills nga may gitas-on nga lima ka tiil matag usa. Gihimo dayon ang physical inventory sa presensya sa usa ka municipal councilor ug media representative, samtang gisunog sa lugar ang mga gilarot nga tanom.
Matod pa ni Jangad, dugay nang ginamonitor sa intelligence operatives ang maong lugar ug gilayon ang operasyon human makumpirma ang presensya sa ilegal nga tanom.