Natala sa Philippine Drug Enforcement Agency (PDEA) Region 10 ang pagkasakmit sa 17 ka kilo nga shabu sa miaging tuig isip kinadak-ang drug recovery sa kasaysayan sa Northern Mindanao.
Kini ang gibutyag ni Alex M. Tablate, Regional director sa PDEA-10 nga ang maong bulto sa druga narekober sa miaging quarter pinaagi sa hiniusang operasyon sa PDEA ug Philippine National Police (PNP). Tungod niini, gipahibalo sa opisyal nga nagpadayon ang inadlaw-adlaw nga anti-drug operations sa mga operatives sa tibuok rehiyon.
Gibutyag usab ni Dir. Tablate nga, mukabat sa 80 ngadto sa 90 porsyento sa suplay sa droga sa Pilipinas ang “imported” o finished product na gikan sa gawas sa nasud. Matud pa, kasagaran sa mga makuha nga suplay sa rehiyon naggikan sa interdiction operations sa Luzon.
Sa gihimong monitoring sa PDEA, wala nay nakitang dagkong clandestine laboratory sa rehiyon. Giklaro sa opisyal nga ang pag-setup og laboratoryo nagkinahanglan og dako nga gasto, dako nga lugar ug mga kemikal nga hugot nga gimonitor sa gobyerno.