Mipadayag og klarong suporta si Miss Earth Philippines Joy Barcoma sa mga residente sa Dupax del Norte, Nueva Vizcaya nga nagpahigayon og anti-mining protest batok sa giplanong operasyon sa minahan sa maong lugar.
Sa pamahayag niini sa social media, gipasabot ni Barcoma ang kamahinungdanon sa Free, Prior, and Informed Consent kon FPIC, nga naghatag og katungod sa mga komunidad, hilabina sa mga lumad, nga makadesisyon kung tugotan ba ang mga proyekto nga makaapekto sa ilang yuta, panginabuhian, ug kalikupan.
Gikwestyon usab niini ang presensya sa daghang kapulisan atol sa protesta ug nanawagan nga paminawon ang tingog sa katawhan.
Matud pa niini, ang yuta ug kinaiyahan angay panalipdan ug dili alang lamang sa interes sa pipila, ug isip Miss Earth Philippines, responsibilidad matud niining ipadayag ang plataporma sa pagpanalipod sa kinaiyahan ug sa katungod sa mga apektadong komunidad.