Gipusil-patay ang tag-iya sa usa ka bugasan sa Purok-10, Guinoyuran Road, Brgy. Poblacion, Valencia City, Bukidnon.
Giila ang biktima nga si Michael Actub, 45 anyos, lalaki.
Base sa inisyal nga imbestigasyon, pasado 5:30 sa hapon niining adlaw nga Sabado, Enero 17, 2026, adunay gituohang lalaki nga sakto og barog, bangason, nagsuot og green nga jacket ug nakahalf-face helmet ang miabot sa tindahan sa biktima ug nagpasumangil nga mipalit og bugas.
Sa wala’y timailhan sa paghagit o rason, kalit nga mibunot og armas ang suspek ug gipusil sa ulo ang biktima.
Ang suspek daling miikyas paingon sa kasadpang direksyon, nga miagi sa Guinoyuran Road samtang sakay sa Bajaj nga motorsiklo.
Gisulayan pa nga gidala sa balay tambalanan si Actub apan gideklara kining dead on arrival tungod sa samad pinusilan sa ulo niini.
Gilayong gipaubos ang tanan nga mga yunit sa full alert status alang sa hot pursuit operation nga gitumong sa paspas nga pagdakop sa miikyas nga suspek.
Kasamtangang padayon pa ang imbestigasyon sa pagsuta sa posibleng motibo lakip na ang pag-ila sa suspetsado.