Nakadawat og batikos ug pagsaway gikan sa pipila ka mga ginikanan ug magtutungha, kalabot na sa sugyot nga pagsuot og sando o sibilyan nga bisti sa mga estudyante sulod sa mga tunghaan taliwala sa dakong hagit sa kainit sa panahon. Sumala kay Maribeth, usa ka ginikanan gikan sa Impasugong, Bukidnon, dili haom o inappropriate alang sa mga estudyante ang pagtambong sa klase nga naka-sando lamang. Gipasabot niini nga mas nagpabiling importante ang pagka-disiplinado ug ang pagsuot og kompletong uniporme sa tunghaan.
Sa pikas bahin alang kay Nelly Rose S. Estillore, usa ka estudyante sa Bukidnon National High School, gipasabot niini ang tukmang pagsul-ob sa biste sulod ug gawas sa tunghaan. Sumala pa niini, nga magsuot og mga sleeveless nga bisti sa ordinaryong adlaw, apan dili kini angay nga isul-ob kon padulong sa eskwelahan tungod kay kinahanglan nga pormal ug desente ang panapot sulod sa tunghaan.
Dugang pa niini, kon magsuot man gani og sleeveless gawas sa eskwelahan, mas maayo nga dili kini sobra ka hayag o open, ug pwede ra usab ang paggamit og nipis nga t-shirt aron mas komportable sa panahon sa kainit.
Nunot niini, hugot nga gipasabot sa laing magtutungha ang kaminungdanon sa tukmang pagsul-ob og desenteng bisti sulod sa eskwelahan. Sumala kay Khim Paulo Ignasio, usa usab ka estudyante gikan sa Bukidnon National High School, dili maayo nga mag-sando lamang o mag-sleeveless ang usa ka estudyante kon mosulod sa eskwelahan tungod susama lamang ngag naa ra sa sulod sa ilahang balay.
Gipahayag usab ni Ignasio nga ang pagsuot og sando sa tunghaan nagpakita og kawalay respeto sa mga sumbanan ug palisiya sa Department of Education (DepEd).