Gianunsyo ni US President Donald Trump ang pagtukod niini og “Board of Peace” alang sa Gaza, nga nagtumong sa temporaryong pagdumala ug pagtukod pag-usab sa naguba nga mga dapit human sa gubat tali sa Israel ug Hamas.
Lakip sa mga founding members niini si US Secretary of State Marco Rubio ug kanhi UK Prime Minister Sir Tony Blair.
Samtang ang executive board naglakip usab sa Middle East envoy nga si Steve Witkoff, Jared Kushner, World Bank President Ajay Banga, Marc Rowan, ug US national security adviser nga si Robert Gabriel, samtang si Trump maoy magsilbi nga chairman of the board.
Gitudlo usab si kanhi UN Middle East envoy Nickolay Mladenov isip representante sa board sa Gaza.
Ang maong board kabahin sa 20-point peace paln ni Trump.
Gawas pa niini, magtukod usab og usa ka International Stabilization Force ubos sa pagpanguna ni US Major General Jasper Jeffers aron suportahan ang seguridad ug pagbansay sa Palestinian police.
Sa susamang higayon, tukoron usab ang separado nga National Committee for the Administration of Gaza, usa ka 15 ka myembro nga Palestinian technocratic body nga gipangulohan ni Ali Shaath, aron manguna sa adlaw-adlaw nga operasyon sa teritoryo.
Kahinumdoman nga gipatuman ang US peace plan kaniadtong Oktubre sa miaging tuig ug kini anaa na sa ikaduhang hugna, nga nagtutok sa pagtukod pag-usab ug demilitarisasyon sa Gaza, lakip ang pagdis-arma sa Hamas.
Bisan pa man, ang kasabutan nagpabilin nga huyang samtang padayon nga nasinati ang mga pagpanglupig ug bayolente nga aksyon, ug sumala sa United Nations, ang kahimtang sa kapin sa 2.1 milyon nga mga Palestinian sa Gaza nagpabilin nga makalilisang.