Gipaabot sa Department of Energy (DOE) nga moubos ang presyo sa lana sa unang semana sa tuig 2026, base sa tulo ka adlaw nga trading sa Mean of Platts Singapore. Sumala kang Department of Energy Oil Industry Management Bureau Assistant Director Rodela Romero, gilauman ang mosunod nga rollback:
- Gasolina – P0.50 kada litro
- Diesel – P0.15 kada litro
- Kerosene – P0.20 kada litro
Miipadayag usab si Romero nga dili pa dako ang bawas kaltas kay wala pa apila ang operating costs sa mga kompanya sa lana. Bisan pa sa tensiyon sa geopolitika, sama sa kahimtangan sa Middle East ug isyu sa Russia-Ukraine, gihulbot paubos ang presyo tungod sa oversupply sa global market, taas nga US inventory, ug hinay nga demand gikan sa dagkong konsumidor sama sa China.
Matud pa niini, ang daghang supply ug huyang nga demand sa unang bahin sa 2026 naghatag og tsansa nga moubos pa ang presyo sa lana, bisan pa sa usab-usab nga presyo sa lana sa merkado.