Giuyog sa kusog nga linog, nga magnitude 6 ang kadagatan sa Cagwait, Surigao del Sur, pasado alas-10:32 sa gabii, Sabado, Oktubre 11, base sa datos sa Philippine Institute of Volcanology and Seismology (Phivolcs). Sumala sa Phivolcs, ang tectonic plates ang hinungdan ug adunay gilawmon nga 24 kilometros.
Posible matod pa nga adunay mga aftershock ug kadaot, apan walay gipagawas nga tsunami warning hangtod sa ulahing oras sa Sabado. Sa inisyal nga report, gikatakda kini nga magnitude 6.2, apan giusab kini sa Phivolcs ngadto sa magnitude 6 sa ilang 11:09 pm bulletin.
Ang linog gibati sa nagkadaiyang lugar:
Intensity IV:
Surigao del Sur (Cagwait ug Carmen)
Cagayan de Oro City
Davao City
Butuan City
Intensity III:
Leyte (Abuyog)
Southern Leyte (Hinunangan, Hinundayan, San Francisco, ug Silago)
Bukidnon (Cabanglasan, Don Carlos, Malaybalay City, ug San Fernando)
Surigao del Sur (Bislig)
Davao Oriental (Mati)
Intensity II:
Leyte (Alangalang, Baybay City, Dulag, Javier, ug Palo)
Samar (Catbalogan City)
Southern Leyte (Sogod)
Bukidnon (Libona)
Misamis Oriental (Gingoog City ug Initao)
Surigao del Norte (Surigao City)
sa laing bahin — mikabat na sa kapin 11,000 ka aftershocks sa cebu, ug kapin 800 sa davao. Dili pa moundang ang kalihokan sa kalibutan, human nga 10,914 ka aftershocks ang natala sa 6.9 magnitude Offshore Cebu earthquake, base sa ulahing datos sa Phivolcs.
Sa maong ihap, 1,886 ang plotted o natumbok sa duha o labaw pang monitoring device, samtang 45 niini ang gibati sa mga residente. Ang kusog sa mga aftershock moabot sa magnitude 1 hangtod 5.1, base sa record sa Phivolcs station sa Medellin, Cebu. Samtang sa Davao Oriental, 831 ka aftershocks ang natala gikan sa magnitude 7.4 ug 6.8 Offshore earthquake na panghitabo, diin 349 ang plotted ug 13 ang gibati sa katawhan. Ang kusog sa maong mga pag-uyog miabot usab gikan sa magnitude 1.2 hangtod 5.8, base sa monitoring sa Mati Phivolcs Station.
Padayon karon ang Phivolcs sa pagbantay sa seismic activity sa Mindanao ug Visayas aron masiguro ang kaluwasan sa publiko.