Gikuwestiyon ni Akbayan Representative Perci Cendaña ang depensa sa kampo ni Vice President Sara Duterte human giingong gisulayan niini nga pamatud-an nga walay shares of stock ang Bise Presidente sa GenCorp Industries Inc.
Nahisgotan kini atol sa pagtestigo ni Atty. Suzette Punay, in-house corporate counsel sa GenCorp Industries Inc. ug Metro City Chow Foods Corp., diin gipasiugda sa depensa nga dili shareholder si Duterte sa maong kompanya.
Apan, gipunting ni Cendaña nga nakatala mismo sa Statement of Assets, Liabilities and Net Worth o SALN ni Duterte ang impormasyon kabahin sa iyang shares of stock sa maong kompanya.
Tungod niini, gikuwestiyon ni Cendaña ang pagkakasaligan sa depensa ug mipahayag nga ang maong sitwasyon nagpakita sa iyang pagduhaduha sa kapasidad sa Bise Presidente sa paghawid og katungdanan sa gobyerno.