Duha ka lalaki ang namatay samtang duha pa ang naangol human mitakilid ang usa ka boom truck nga nagkarga og Pajero sa Poblacion 1, Aluijed, Villanueva, Misamis Oriental, sayong kagabhion niadtong Martes, Nobyembre 10.
Giila ang mga namatay nga sila si Jonathan Maños, nga maoy drayber sa boom truck, ug si Alyas Jemuel. Samtang naangol sila Allan Miego ug Ray Ramit, nga pulos residente sa Cagayan de Oro City.
Base sa gisaysay ni Christopher James Miego, igsoon ni Allan, gikan sa Claveria, Misamis Oriental ang grupo ug paingon na matud pa sa Cagayan de Oro City human mapalit ang Pajero nga ilang gikarga.
Gituohang nawad-an og kontrol ang boom truck samtang milikay sa usa ka motorsiklo nga nag-agi sa dalan, hinungdan nga nitakilid kini ngadto sa pangpang.
Nasayran usab nga misulay og ambak si Jemuel aron makalikay sa aksidente, apan naigo gihapon sa nahagbong nga Pajero ug namatay.
Padayon pa ang imbestigasyon sa mga otoridad aron matino ang eksaktong hinungdan ug mga sirkumstansiya sa maong aksidente.