Mipahimangno si Senate Impeachment Court Presiding Officer Francis “Chiz” Escudero nga mahimong silotan og contempt ug kasong perjury ang bisan kinsang testigo nga mamakak atol sa impeachment trial ni Vice President Sara Duterte.
Gipahinumdoman ni Escudero ang mga testigo sa ilang obligasyon nga mosulti sa kamatuoran ubos sa panumpa, human ipataas ni Senator-Judge Vicente “Tito” Sotto III ang pangutana bahin sa silot sa pagpamakak. Gipasiugda usab ni Senator-Judge Panfilo “Ping” Lacson ang Rule 5 sa Senate Resolution No. 39 nga naghatag og gahom sa hukuman sa pagpahamtang og contempt.
Sa laing bahin, gipadayag ni Escudero nga nanghinaot siyang mahuman ang impeachment trial sa dili pa ang Pasko o Bag-ong Tuig, apan magdepende kini sa gidugayon sa pagpangutana, mga ebidensiyang ipresentar sa depensa ug kahandaan sa mga testigo.