Duha ka 26-anyos nga lalaki ang nadakpan sa managlahing buy-bust operation sa mga kapulisan sa Baungon ug Don Carlos, Bukidnon.
Sa Baungon, upat ka sachet sa gituohang shabu nga motimbang og duha ka gramo ug nagkantidad og ₱13,600 ang narekober gikan sa suspek sa operasyon sa Purok 6, Barangay Batug, pasado alas 3:16 sa hapon.
Samtang sa Don Carlos, tulo ka pakete sa gidudahang shabu nga motimbang og 0.23 gramos ug nagkantidad og ₱2,040 ang nasakmit gikan sa laing suspek sa Purok 7, Poblacion Sur.
Nakuha usab sa duha ka operasyon ang tag-₱500 nga buy-bust money, kauban ang ubang mga gamit nga may kalabotan sa iligal nga droga.
Giatubang sa duha ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Ania na sila sa kustodiya sa tagsa-tagsa nilang municipal police station.