Gimandoan ni North Korean leader Kim Jong Un ang mga opisyal sa ilang militar nga siguruhong andam sa pakiggubat ang tanang yunit sa ilang kasundalohan.
Sumala sa taho, gipadayag ni Kim Jong Un nga kinahanglan palig-onon ang kapasidad sa matag sundalo pinaagi sa hugot ug makanunayong pagbansay.
Gipagawas ang maong direktiba human mitambong si Kim sa tigom uban sa mga lider militar sa Pyongyang niadtong milabay’ng mga adlaw.
Atol sa maong panagtigom, gimandoan usab niini ang mga kumander nga tukoron ang mas lig-on nga kasundalohan ug paspasan ang pagpatuman sa Korean-style military revolution pinaagi sa pagpalambo sa pagbansay sa matag yunit.
Matud sa state-run media sa North Korea, unang higayon kini nga gipahigayon ang panagtigom sa mga lider sa tanang kompanya sa kasundalohan sukad sa Ninth Congress sa Workers’ Party niadtong Pebrero.