Pipila ka oil facilities sa Saudi Arabia, naigo sa drone ug air strikes sa rebeldeng  Houthi 

Gipaulanan og missiles ug drone strike sa mga rebeldeng Houthi sa Yemen ang pipila ka oil facilities ug military targets sa habagatang bahin sa Saudi Arabia.

Lakip sa gitumbok ang mga pasilidad sa Aramco sa Abha, Najran ug Jizan, ingon man ang airbase sa Khamis Mushait. 

Matud sa tigpamaba sa Houthi military nga si Yahya Saree, kini silbi tubag sa mga pag-atake sa Saudi Arabia batok sa ilang grupo sa Yemen.

Giakusahan usab sa Houthis ang Riyadh sa pagsuporta ug paghatag og armas sa mga pwersang Yemeni nga nakigbatok kanila. Tungod sa pag-atake, adunay mga oil facility nga nasunog ug 73 ka tawo ang nasamdan, sumala sa Saudi authorities.

Gisaad usab sa Saudi-led coalition ang pagresponde batok sa Houthis.