Gilauman nga mahuman ug mapahimuslan sa Oktubre 2026, o sa sayong bahin sa 2027, ang bag-ong duha ka andana nga building sa City Disaster Risk Reduction and Management Office (CDRRMO) sa Malaybalay City nga nagkantidad og P50 milyon ubos sa administrasyon ni Mayor Jay Warren Pabillaran.
Gipadayag ni CDRRMO Head Allan J. Comiso sa Bombo Radyo Malaybalay nga ang bag-ong pasilidad gitukod sa estratehikong lokasyon sa Barangay Poblacion aron mahimong sentrong opisina sa kapin 210 ka kawani sa CDRRMO ug mapaspasan ang paghatag og serbisyo atol sa mga kalamidad.
Gibutyag ni Comiso nga target sa kontraktor nga mahuman ang proyekto sa Oktubre 2026 base sa impormasyon gikan sa City Engineering Office. Matud niya, ang P50 milyong building gipondohan sa City Government of Malaybalay ug magsilbing permanenteng opisina sa tanang kawani sa CDRRMO.
Gilauman usab nga masulbad ang kakulang sa luna ug pagkabulag sa mga opisina sa CDRRMO human makabalhin sa bag-ong 9.5 ka ektaryang compound.
Sa pagkakaron, nagkatag pa ang ilang Emergency Medical Services sa Plaza ug ang Search and Rescue unit sa Merkado, samtang limitado usab ang parkinganan sa ilang mga emergency vehicles.