Gikabalak-an sa Bukidnon Second Electric Cooperative (BUSECO) ang posibleng epekto sa nagdaghang mga solar photovoltaic system sa mga panimalay, ilabi na sa seguridad sa mga lineman ug sa kita sa kooperatiba.
Matud ni BUSECO General Manager Christopher Dulfo, padayon nilang gitun-an pinaagi sa ilang safety committee ang mga risgo nga mahimong maatubang sa mga trabahante sa linya, ilabi na panahon sa mga bagyo ug emergency repair, tungod sa posibilidad nga adunay mosulod nga kuryente gikan sa mga solar system.
Gipasabot ni Dulfo nga dili mapugngan ang mga konsumante nga magbutang og solar panels tungod kay kini usa ka katungod sa mga tag-iya sa panimalay, apan gikinahanglan ang hustong koordinasyon ug safety measures aron malikayan ang aksidente.
Sa bahin sa pinansyal nga epekto, giangkon sa opisyal nga mahimong mokunhod ang sales sa electric cooperative tungod sa paggamit sa kaugalingong energy source sa pipila ka konsumante.
Apan matud niini, giandam na sa BUSECO ang pag-atubang sa maong kausaban pinaagi sa pagplano ug pagtan-aw sa umaabot nga panginahanglan sa kooperatiba, ilabi na sa pagmintinar sa lig-on nga serbisyo ug nanawagan sa padayon nga koordinasyon tali sa mga konsumidor alang sa dugang kahibalo ug mga katikaran.