Nakasakmit ang Police Regional Office 10 og kontrabando nga nagkantidad og P14.36 milyon ug nakadakop og 195 ka indibidwal atol sa usa ka semana nga operasyon sa tibuok Northern Mindanao gikan Setyembre 21 hangtod 27, 2026.
Pinakadako sa nasakmit ang gituohang shabu nga mikabat og 1,496.422 gramos nga gibana-banang P9.46 milyon ang kantidad, atol sa 61 ka operasyon diin 75 ang nadakpan.
Nasakmit usab ang smuggled cigarettes nga nagkantidad og P4.25 milyon atol sa 29 ka operasyon.
Gawas niini, 83 ka wanted persons ang nasikop, lakip ang 20 ka most wanted ug 63 ka ubang wanted persons.
Siyam ang nadakop sa kampanya batok loose firearms, samtang 57 ka gagmay nga armas ug usa ka light weapon ang nasakmit, misurender o narekober.
14 ang nadakpan sa illegal gambling, 11 sa illegal mining, ug nasakmit usab ang mga mineral ores ug heavy equipment nga gibana-banaang mubalor og P641,396.