Gipahinumdoman sa International Criminal Court (ICC) ang mga abogado ug mga partido nga nalambigit sa kaso ni kanhi Presidente Rodrigo Duterte nga likayan ang paghatag og mga komento o interview sa media bahin sa nagpadayong dagan sa husay.
Atol sa ikaduhang status conference niadtong Martes, Hunyo 23, gipasabot ni Presiding Judge Joanna Korner nga ang hustong dapit sa pagpadayag sa mga reklamo o isyu anaa sulod sa courtroom ug dili sa “court of public opinion.” Matud niya, wala’y rason nga mopahayag pa ang mga abogado sa media tungod kay mahimo lang kining sakyan ug gamiton sa pagpakatag og mga “fake news.”
Gihimo sa huwes ang maong pasidaan tungod sa grabeng interes sa publiko sa maong kaso nga gikatakdang sugdan ang pormal nga trial karong Nobyembre 30, 2026, dungan sa pag-awhag usab sa media nga magbalita og husto ug patas aron malikayan ang mga espekulasyon.