Hingpit nga gipanghimakak ni Comelec Chairperson George Erwin Garcia ang alegasyon nga nakadawat siya og P10 milyon nga giingong gidala sa mga kanhi bodyguard ug bagmen ni Zaldy Co.
Matud ni Garcia, bakak ug walay kamatuoran ang tanan nga mga alegasyon batok kaniya ug wala siyay bisan unsang kalabotan sa mga flood control project.
Gikwestyon usab ni Garcia ang nagkalainlaing pamahayag sa mga nagpa-ilang mga bagmen.
Matud ni Garcia, una nilang giangkon nga upat ka maleta ang ilang gidala ug gitugyan kaniya sa atubangan sa Midas Hotel, apan karon nag-ingon sila nga gagmay lamang nga mga bag ang ilang gigamit.
Gipasiugda sa Comelec chief nga adunay nagtudlo sa mga maong kanhing bodyguards kon unsay ilang isulti ug dili kini nagpakita sa tinuod nga nahitabo.