Giposasan sa mga awtoridad ang duha ka lalaki human madakpan sa gikasang buy-bust operation didto sa Purok 10, Barangay Casisang, ning siyudad, niadtong Hunyo 16, 2026, pasado alas-11:37 sa buntag.
Subay sa datus gikan sa Bukidnon Police Provincial Office (BukPPO), ang hiniusang operasyon gipangunahan sa mga operatiba sa Malaybalay City Police Station, kauban ang Bukidnon 1st PMFC ug Provincial Intelligence Unit. Ang mga dinakpan giila nga mga lalaki nga nag-edad og 40 ug 46 anyos, diin nasakmitan sila og unom ka sachet sa gidudahang shabu nga may gibug-atong 3.074 gramos ug nagkantidad og P20,903.20. Lakip sa narekober ang buy-bust money, cellphone, drug paraphernalia, ug usa ka motorsiklo.
Sa pagkakaron, balhog na sa selda sa Malaybalay CPS ang mga suspetsado samtang gihikay na ang seryosong kasong paglapas sa Sections 5, 11, ug 26 sa Republic Act 9165 kon Comprehensive Dangerous Drugs Act of 2002 batok kanila.