MALAYBALAY CITY — Nangayo og dinalian nga pasaylo ang pamunoan sa 88th Infantry Battalion (88IB) ngadto sa kabanay sa biktimang si Nenita Buscada ug sa pamilya niini human sa nahitabong duguong pagka-masayop og pamusil sa mga sundalo didto sa bukiron nga bahin sa Sitio Mahayag, Barangay St. Peter, ning siyudad niadtong Hunyo 15.
Sa pakighinabi sa Bombo Radyo Malaybalay kang Lt. Col. Arnold Bautista, ang commanding officer sa 88IB, gipatin-aw niini nga anaa sa high alert mood ang iyang mga tropa nga nikanaug gikan sa monthly troop relief sa ilang detachment sa Tower. Gitumbok ni Bautista nga gawas nga kanhi na nga gi-ambushan ang ilang tropa sa maong dapit nga nikalat sa duha ka sundalo, nakasagupa usab nila ang mga armadong grupo niadtong Hunyo 4 ug Hunyo 6 didto sa Barangay Busdi, Upper Pulangi. Matud sa opisyal, nakamatikod og pusil ang mga sundalo sa dapit ug wala sila masayod nga duna’y sibilyan tungod kay wala kini nagpahibalo sa detachment sa Sitio Mahayag, nga maoy naandang patakaran alang sa seguridad sa pagsaka sa maong dapit.
Human sa insidente, dinalian nga gi-applyan og first aid sa militar ang biktima, apan wala na kini matabang gumikan sa seryosong samad-pinusilan niini sa tiyan, samtang gidala usab sa tambalanan ang naangol nga bana niini.
Sa pagkakaron, gipasalig sa pamunoan sa 88IB nga sila na ang miabaga sa tanang gastuhon sa ospital ug sa Villanueva Funeral Homes, dungan sa paghatag og igong panahon ug espasyo sa nagsubong pamilya una pa man kini mupagawas og ilahang opisyal nga pamahayag kalambigit sa maong trahedya.