Nakurat ang daghang mamalitay sa usa ka supermarket sa Estonia human nilang makit-an ang usa ka higanteng bato nga nahimutang mismo sulod sa shopping center.
Imbis mga produkto ug estante lamang ang ilang maabtan sa sulod, usa ka dako nga bato nga adunay gibanabanang gitas-on nga 22 metros ug gilapdon nga 6 metros ang nakadani sa atensyon mga mamalitay.
Ang maong bato nahimong paboritong atraksyon sa mga bisita.
Ang maong bato gituohang kapin 10,000 ka tuig na ang kagulangon ug nadiskobrehan lamang sa dihang nag-ukay ang mga trabahante sa lugar alang sa pagtukod sa shopping center.
Sa sinugdan, plano unta sa mga trabahante nga tipakon ug tangtangon ang bato aron mapadayon ang proyekto.
Apan gisupak kini sa mga lokal nga residente human mahibal-an nga kini usa ka “erratic boulder” nga adunay dakong bili sa kasaysayan ug siyensya.
Ang mga erratic boulder mao ang mga bato nga gidala sa mga glacier gikan sa laing dapit liboan ka tuig na ang milabay ug gibiyaan sa dihang natunaw ang yelo panahon sa Ice Age.
Tungod niini, importante kini sa pagtuon sa geology ug sa kasaysayan sa kalibotan.
Karon, imbes nga mahimong babag sa konstruksyon, ang higanteng bato nahimo nang usa ka talagsaong atraksyon nga ginadagsa sa mga mamalitay ug bisita nga gusto magpakuha og litrato ug video uban niini.