Gikuwestiyon sa House prosecution panel kung unsaon nga mahimong epektibo ang pag-apil isip senator-judge ni Senador Jinggoy Estrada sa impeachment trial batok kang Vice President Sara Duterte kung dili kini makatambong sa pisikal nga paagi.
Ang maong pamahayag ni House Prosecutor Joel Chua ug trial spokesperson Renee Co mitumaw atol sa paglunsad sa “Bantay Impeachment” sa Claret School, Quezon City.
Sumala ni Chua, importante nga nga physically present ang usa ka senator-judge aron makita ang lihok sa mga testigo ug masusi kung nagsulti ba kini sa tinuod o dili.
Gipasabot usab ni Co nga walay kausaban sa mga patakaran sa Senado, mao nga gilauman nga aduna gihapoy limitasyon ang partisipasyon ni Estrada tungod sa iyang preventive suspension.
Gipunting sab ni Rep. Co dako ang kalahi-an sa kalidad sa paghukom kung personal ug atubangan nga makita ang dagan sa pagdungog kaysa sa online o sa layo lang nga pamaagi.
Samtang, wala pa’y klarong desisyon ang Senado kung kinsa ang magsilbing Presiding Officer o pangulo sa impeachment court.
Gilauman nga masayran kini sa pagsugod sa pagdungog karong umaabot Hulyo 6, diin atubangon ni VP Duterte ang mga reklamo mahitungod sa confidential funds, unexplained wealth, bribery , ug pagpanghulga sa mga opisyal.