Gibutyag ni House Prosecutor ug Bicol Saro Partylist Rep.Terry Ridon nga aduna silay gihuptan nga bag-ong ebidensya batok kang Vice President Sara Duterte may kalabotan sa mga kabtangan niini ug sa iyang bana nga wala matud pa gideklara sa ilang Statement of Assets, Liabilities, and Net Worth (SALN) gikan sa tuig 2007 hangtod 2024.
Sa paglunsad sa “Bantay Impeachment” sa Claret School, gipahayag ni Ridon nga nakatala ang mga kabtangan sa mga ahensya sa gobyerno apan wala migawas sa SALN sa Bise Presidente.
Ang maong bag-ong ebidensya gamiton aron pamatud-an ang reklamo bahin sa “unexplained wealth” o dili mapasabot nga bahandi nga usa sa upat ka reklamong giatubang ni Duterte.
Sumala ni Manila 3rd District Representative Joel Chua, igo ug sobra pa ang ilang mga ebidensya ug mga testigo aron mapamatud-an ang giingong mga iregularidad ug kumpyansa ang prosecution sa kabug-aton sa ilang mga ebidensya.
Subay niini, gipasabot ni Ridon nga wala kini napagawas sa mga nangaging pagdungog sa Kamara, hinungdan nga giisip kini nga bag-o ug pormal nga iapil sa isumite nga pretrial brief ngadto sa Senado sa mosunod nga semana.
Matud pa ni Ridon, walay balaod nga nagdumili sa prosekusyon sa pagpasulod ug mga bag-ong ebidensya sa dili pa mahuman ang pretrial stage.
Gidayeg usab ni Ridon si House Prosecutor Joel Chua, nga maoy nakadiskubre sa maong mga bag-ong ebidensya.
Dugang pa, gibutyag usab ni House Prosecutor Joel Chua nga usa lamang ka Article of Impeachment nga mapamatud-an ug makakumbikto sa Senado igo na aron mapahawa sa pwesto ang Bise Presidente.
Tungod niini, gitutokan sa House prosecutors ang pagpili sa labing kusgan nga mga ebidensya ug testigo aron mapalig-on ang ilang kaso sa umaabot nga impeachment trial.