Nagpasidaan si Senator Panfilo “Ping” Lacson nga posibleng mosangpot sa usa ka constitutional crisis ang impeachment trial batok kang Vice President Sara Duterte kung adunay kakulangan sa mga senator-judges tungod sa posibleng preventive suspension o pagkadetinir sa pipila ka mga senador nga nalambigit sa imbestigasyon sa giingong iregularidad sa mga proyekto sa flood control.
Sumala ni Lacson, kinahanglan tun-an kung mahimo bang tugotan ang mga suspendido o nakadetinir nga senador nga makapadayon sa ilang katungdanan isip senator-judges bisan pa og dili sila makapadagan sa ilang trabaho isip mga mambabalaod.
Gipasabot ni Lacson nga bisan og usa ra ang Senado ug impeachment court sa komposisyon, posible nga lahi ang legal nga interpretasyon niini isip duha ka magkalahi nga institusyon.
Matud pa ni Lacson, kung lahi nga entidad ang impeachment court ug Senado, posible nga ang suspensyon moigo lamang sa ilang katungdanan isip senador ug dili isip senator-judge.
Gipasabot usab niini nga kung moabot sa siyam ka senador ang masuspinde o mapriso, 15 na lang ang mabilin sa impeachment court.
Sumala sa Konstitusyon, kinahanglan ang 2/3 nga boto sa tanang senador, o 16 ka boto, aron mahatagan og silot ang usa ka opisyal sa impeachment proceedings.
Dugang pa niini, nga posible usab nga tugotan ang mga nakadetinir nga senador nga motambong sa hearing ubos sa hugot nga pagbantay sa BJMP.
Usa pa sa mga opsyon nga gitan-aw sa senador ang temporaryong pag-postpone sa impeachment trial hangtod matapos ang 90 ka adlaw nga preventive suspension sa mga apektadong senador.
Sigon pa ni Lacson nga importante nga matuki ang mga posibleng senaryo aron adunay klaro nga legal nga basehan kon moabot ang maong sitwasyon.
Sa pikas bahin, gisupak niini ang giingon ni former Senate President Alan Peter Cayetano nga mahimong ipaubos sa 12 ang kinahanglan nga boto para sa conviction o acquittal sa impeachment trial, ug gipunting nga klaro sa Konstitusyon ang 2/3 nga requirement sa tanang miyembro sa Senado.