Gipasigarbo ni US President Donald Trump nga hapit na matud pa motubag ang Iran sa ilang gipanukalang kasabutan alang sa kalinaw tali sa duha ka nasud.
Matud ni Trump, gilauman nga pirmahan sa Iran ang maong peace agreement karong Domingo.
Gisuportahan usab kini sa Pakistan, nga nagsilbing pangunahing tigpataliwala sa negosasyon, ug miingon nga ang pagpirma sa kasabutan himuon pinaagi sa electronic signing.
Ubos sa memorandum of understanding tali sa Estados Unidos ug Iran, magsugod ang 60 ka adlaw nga negosasyon aron hisgutan ang paagi sa pagpatuman sa gikasabutan nga framework ug pagsulbad sa nahibiling mga isyu tali sa duha ka panig.
Apan, gilimod sa Islamic Revolutionary Guard Corps (IRGC) sa Iran ang mga pahayag nga adunay ingon nianang plano sa pagpirma sa kasabutan, nga nagpadayon sa kawalay kasiguruhan sa kahimtang tali sa duha ka nasud.