MALAYBALAY CITY — Gi-anunsyo ni Malaybalay City Mayor Jay Warren Pabillaran ang dako nga plano sa pagtukod sa usa ka 15-ektaryang Eco-MICE Innovation Park nga gilaumang mamahimong bag-ong sentro sa negosyo, turismo, ug panginabuhian sa dakbayan.
Atol sa iyang mensahe sa pagsaulog sa ika-149 nga Aldaw ta Malaybalay, gipadayag sa mayor nga ang maong mega-project ipahimutang sa dapit sa Rehabilitation Center sa Barangay Casisang, ubos sa Diversion Road. Maglangkob kini sa usa ka modernong Convention Center, open field event area, terminal, mixed-use residential ug commercial area, Innovation and Enterprise Center, ug usa ka Eco-Recreation Park.
Nasayran nga ang maong luna napalit na sa lokal nga kagamhanan pinaagi sa pondo nga gikan sa dul-an ₱70 milyones nga savings sa tuig 2025 ug sa regular nga pondo sa siyudad. Bisan gipatin-aw ni Pabillaran nga nagkinahanglan pa og taas nga panahon una kini hingpit nga makompleto, iyang gihangyo ang suporta sa mga lumulupyo aron masugdan na ang pagplano alang sa malungtarong kalamboan sa umaabot nga henerasyon sa Malaybalay.