Dakpan sa hiniusang operasyon sa kapulisan ang gikonsiderang Top 8 Most Wanted Person sa city level didto sa Purok 5, Barangay Ono, dakbayan sa Malaybalay niadtong Biyernes sa udto, Hunyo 12.
Giila ang dinakpan nga si Sittie Farhanah Sultan Bertudan, 30-anyos, minyo, ug residente sa Barangay 9 sa maong siyudad. Si Bertudan gisilbihan sa iyang warrant of arrest ubos sa Criminal Case Nos. 42043-23 ug 42044-23 nga gipagawas niadtong Mayo 22, 2026, alang sa pagserbi sa iyang sentensya tungod sa paglapas sa Republic Act 9165 o Comprehensive Dangerous Drugs Act of 2002. Walay gitakdang pyansa ang maong mga kaso alang sa iyang kagawasan.
Ang malampusong pagdakop gipahigayon sa mga personahe sa Malaybalay City Police Station, inabagan sa Bukidnon 1st Provincial Mobile Force Company, Bukidnon Provincial Intelligence Unit, ug Regional Intelligence Unit 10.
Sa kasamtangan, ang dinakpan nagpabilin sa kustodiya sa Malaybalay City Police Station alang sa saktong dokumentasyon ug legal nga disposisyon, samtang nagpadayon ang hugot nga kampanya sa kapulisan batok sa mga nagatago sa balaod sa tibuok lalawigan.