Giila ni Senador Loren Legarda nga “unconstitutional” o supak sa Konstitusyon ug walay bisa ang nahitabong balasahan sa liderato sa Senado niadtong Miyerkules, Hunyo 3, 2026.
Sa iyang opisyal nga video statement, gipasabot sa senadora nga supak sa balaod ang pagtudlo kang Senador Sherwin Gatchalian isip Senate President Pro Tempore ug Acting Senate President.
Matud ni Legarda, dili mahimong mopili og bag-ong mga opisyal ang bag-ong mayoryang grupo tungod kay napakyas kini sa pagkuha sa igo nga gidaghanon sa boto nga gitakda sa balaod.
Gipakita usab sa senadora ang legal nga basehan nganong dili ilhon ang bag-ong liderato.
Sumala ni Legarda, subay sa Article VI, Section 16 sa 1987 Constitution ug Rule II, Section 2 sa Rules of the Senate, gikinahanglan ang mayoryang boto sa tanang miyembro aron makapili og opisyal.
Tungod kay adunay 24 ka senador, ang mayorya katugbang sa 13 ka boto.
Dugang pa ni Legarda, 12 lamang ka senador ang mibotar sa maong sesyon busa wala kini legal nga gahum aron mag-apruba og bisan unsang reorganisasyon.
Gibarugan usab niini nga supak sa Konstitusyon ang pagdeklara nga bakante ug ang pagtudlo og mga chairperson sa pipila ka komite sa Senado.
Sigon pa usab ni Legarda nga ang gigamit nga basehan sa minority nga Avelino v. Cuenco sa pag-takeover sa Senado nakabase pa sa 1935 Constitution.
Matud niya, karaan na kini nga prinsipyo gumikan ang 1987 Constitution na ang kasamtangang naglatid sa mga lagda.
Gipasiugda usab niya nga siya sa gihapon ang lehitimong Senate President Pro Tempore hangtod walay legal nga basehan sama sa pagpahawa o diskwalipikasyon batok kaniya.