Luwas ug milagrong nakalabang sa kamatayon ang usa ka Nepali mountain guide human kini ma-stranded og hapit unom ka adlaw sa Mount Everest nga walay igong nga oxygen, pagkaon, ug tarong nga kapasilungan.
Gituohan nga patay na ang giilang si Dawa Sherpa human kini mawad-an og kontak samtang nagpaingon na paubos gikan sa tumoy sa Everest.
Apan human sa unom ka adlaw, nakit-an siyang buhi sa usa ka cleanup team samtang hinay-hinay kining paingon sa Everest Base Camp, ug dali dayon kining gisakay og helicopter paingon sa usa ka ospital sa Kathmandu aron matambalan tungod sa dehydration, frostbite, ug mga bali sa bukog.
Sumala sa asoy ni Sherpa, na-trap kini human nahulog sa usa ka nabuak nga yelo o crevasse sulod sa kapin duha ka adlaw ug tunga, ug ang pipila ka tsokolate nga iyang nakit-an sa iyang bulsa maoy nakatabang kaniya nga mabuhi.
Mapasalamaton kini tungod ang nahitabong avalanche o pagdahili sa yelo mao pa hinuon ang mipuno sa maong liki, hinungdan nga nakagawas siya ug nakagamit sa mga pisi sa maong bukid aron makanaog bisan pa man sa kakuyaw.
Subay sa mga report, duna nay lima ka tawo ang namatay sa kasamtangang climbing season sa Everest, samtang moabot na ngadto sa kapin 300 ka indibidwal ang nakalas sukad pa niadtong dekada 1920, nga nagpakita sa walay hunong nga kapeligrohan sa pagsaka sa labing taas nga bukid sa kalibutan.