Gikumpirma sa militar sa Estados Unidos nga naglunsad sila og mga “self-defense strike” sa Qeshm Island sa Iran human gitarget sa mga Iranian missile ug drone ang mga instalasyon sa Amerika didto sa Kuwait ug Bahrain.
Matod sa pamahayag sa US Central Command (CENTCOM), duha ka ballistic missile nga gipabuto sa Iran paingon sa Kuwait ang napakyas ug wala makaigo sa target niini. Samtang, tulo ka laing missile nga gipadala paingon sa Bahrain ang malampusong na-intercept o nasumpo sa nagkahiusang pwersa sa US ug Bahrain.
Gawas niini, nakuha usab sa US nga ma-intercept ang tulo ka drone nga gipabuto sa Iran paingon sa mga sibilyan nga tripulante sa barko (civilian mariners) sa maong rehiyon.
Bisan pa man sa nahitabong sinukliay sa kalayo tali sa duha ka pwersa, nanindugan ang Estados Unidos nga nagpabilin gihapon ug padayong gipatuman ang ceasefire o hunong-buto tali sa duha ka nasod.