Patay ang lima ka tawo human sa karambola sa pipila ka sakyanan sa Virginia. Matud sa kapulisan, nahitabo ang aksidente sa Interstate 95 diin gidaro sa usa ka pampasaherong bus ang pipila ka sakyanan sa unahan niini.
Nasunog pa ang usa ka sakyanan tungod sa kusog nga pagkabangga, diin upat ka tawo ang namatay sulod sa maong niini.
Lakip sa namatay sa sulod sa awto mao ang usa ka 13-anyos nga dalagita ug usa ka 7-anyos nga igsuong lalaki, nga pulos lumulupyo sa Greenfield, Massachusetts.
Samtang, usa ka 25-anyos nga babaye nga residente sa Worcester, Massachusetts ang namatay usab sulod sa iyang SUV.
Adunay 44 ka laing mga tawo ang gidala sa tambalanan tungod sa mga samad nga naangkon sa maong aksidente.
Padayon pang ginasuta sa mga awtoridad ang hinungdan sa aksidente, diin ginaandam na usab ang kaso batok sa drayber sa bus nga giilang si Jing S. Dong gikan sa Staten Island, New York.