Nakaplagang wala nay kinabuhi ang usa ka 82 anyos nga Canadian national sulod mismo sa iyang kuwarto didto sa Purok Sais (6), Barangay Maligaya ning siyudad sa Malaybalay tungod sa komplikasyon sa panglawas.
Giila sa kapulisan ang biktima nga si Joseph Thomas Ison, diin nakit-an kini pasado alas-otso kwarenta (8:40) sa buntag niadtong Mayo 25 nga naghigda na sa iyang hospital bed. Base sa pamahayag sa pamilya ngadto sa mga otoridad, katapusan kining nasusi sa iyang asawa ug stepson pasado tungang gabii diin wala na kini motubag, human duna pa kini gihambin nga reklamo kalabot sa grabeng sakit sa lawas. Gikatahong sukad pa niadtong Enero ning tuiga kanunay nang naghigda ang maong langyaw tungod sa sakit nga diabetes, komplikasyon sa kasingkasing, ug duna pa kini agi nga total hip replacement surgery niadtong Marso 24.Sa inisyal nga assessment sa Malaybalay City Police Station, walay nakit-an nga bisan unsang timailhan sa foul play sa sa lawas sa biktima. Bisan pa man niini, gihangyo gihapon sa pamilya sa langyaw nga ipaubos sa autopsy ang patayng lawas niini aron hingpit nga matino ang eksaktong medikal nga hinungdan sa iyang kamatayon.