Pormal nga gidawat ug giila sa mga lider ug miyembro sa tribung Agtulawun Mintapod Higaonon Cumadon o (AGMIHICU) ang presensya sa 8th Infantry Battalion sa Philippine Army sulod sa mga dapit sa Hagpa ug Kalabugao pinaagi sa pagpahigayon sa tradisyonal nga ritwal nga “Tagulambong Hu Untong” pandawat, nga gipahigayon sa Mintapod Tribal Tulogan, Barangay Mintapod, Hagpa, Impasugong, Bukidnon niadtong milabayng adlaw.
Ang maong kalihukan, nga natunong usab sa pagsaulog sa ika-18 nga Founding Anniversary sa AGMIHICU, nagpakita sa nagkakusog nga pagsalig, respeto, ug panagtambayayong tali sa komunidad sa mga Lumad ug sa militar isip kaabag sa pagpatunhay sa kalinaw, seguridad, ug kalamboan sa ilang yutang kabilin, diin si AGMIHICU President Datu Laban uban ni Datu Amai Mantangkilan nipahayag sa ilang lig-ong suporta ug tinguha nga makigtambayayong sa kasundalohan aron mapugngan ang dautan ug mapadayon ang kahapsay sa ilang mga komunidad.