Andam na ang kasong ipasaka batok sa suspek sa pagpamusil-patay sa usa ka negosyante ug tag-iya sa Monjay Electrical Supply human kini paspas nga gipaubos sa interogasyon sa kapulisan.
Kini human mitalasik ang kinabuhi sa biktima nga giilang si alyas Boy Dela Cruz, samtang naangol usab ang on-duty nga security guard niini nga daling nanalipod apan naigo gihapon sa bala. Ang madugong insidente nahitabo sulod mismo sa maong establisamento diha sa Moreno Street, Barangay 8, Malaybalay City, Bukidnon, niadtong Mayo 15, 2026, takna alas-9 kapin sa buntag.
Sumala sa inisyal nga imbestigasyon sa kapulisan ug, ang suspetsado nga usa usab ka negosyante ug naggamit og lisensyadong armas, mibiyahe pa kini gikan sa Dakbayan sa Davao sakay sa usa ka sakyanan aron anhaon ug kuwentahon ang iyang mismong uyuan.
Nasayran nga nagpahipi ang karaan nga panagbikil sa yuta tali sa mag-uyuan nga una nang gipaningkamotan nga ma-settle sa barangay duha ka tuig na ang milabay apan misangpot gihapon sa maong trahedya.
Kahinumduman nga sa pakighinabi sa Bombo radyo Malaybalay kang PLtCol. Joepet B. Paglinawan, ang hepe sa Malybalay City Police Station, gikumpirma usab niini nga ang motibo o hinungdan mao ang panagbangi sa yuta nga miresulta sa dinaliang kamayon sa biktima. .