Misamot ang tensyon sa Middle East human mibahad ang Iran nga ilang atakihon ang mga pwersa sa Estados Unidos sa Strait of Hormuz kon ipadayon ni Presidente Donald Trump ang plano niini nga magpadala og mga escort alang sa mga barko sa lana.
Ang maong bahad gikan sa Tehran nagsunod sa deklarasyon ni Trump nga ang militar sa Amerika mohatag og seguridad sa mga commercial vessels nga moagi sa maong krusyal nga agianan sa tubig. Matod sa Iran, ang presensya sa Amerika sa maong dapit usa ka “provocation” o paghagit ug hulga sa ilang nasudnong seguridad.
Giklaro sa mga opisyal sa Iran nga andam silang mogamit og pwersa kon mobati sila nga nameligro ang ilang soberanya. Samtang sa pikas bahin, ang Washington nagkanayon nga ang escort plan gihimo aron masiguro ang gawasnong pagbiyahe sa mga barko taliwala sa nagkagrabe nga hulga sa maong rehiyon.
Tungod niini, nabalaka ang tibuok kalibutan sa posibleng pagsilaob sa usa ka gubat nga makaparalisa sa suplay sa lana ug makadaot sa ekonomiya sa kalibutan.