PANGANTUCAN, BUKIDNON – Gidudahang gihimo lang nga paagi o “stunt” ang usa ka bomb threat aron lang ma-postpone ang nakatakdang thesis defense sa pipila ka mga estudyante sa Pangantucan Community College niadtong miaging semana.
Sa eksklusibong pakighinabi sa Bombo Radyo Malaybalay kang PSMS Richard Memeje, Technician ug Investigator sa Bukidnon Provincial EOD, gibutyag niini nga dako ang posibilidad nga usa ka estudyante ang nagpaluyo sa maong pagpanghulga. Nasayran nga adunay 15 ka mga estudyante sa Criminology Department ang wala pa maka-comply sa ilang mga rekisitos alang sa ilang defense, hinungdan nga mitumaw ang pagduda nga tuyo kining gihimo aron maka-extend sa deadline.
Hinuon, gideklarar nga “safe and clear” ang tibuok tulunghaan human sa dinaliang inspeksyon sa mga otoridad diin negatibo ang resulta sa bomba. Sa pagkakaron, ang maong kaso gidala na sa Anti-Cybercrime Unit aron mailhan ang tinuod nga tag-iya sa Facebook account nga gigamit sa pagpanghulga.
Warning sa kapulisan, ang mapamatud-ang sad-an mag-atubang og bug-at nga silot ug multa nga moabot sa 40,000 pesos base sa balaod. Padayon pa ang gihimong pagpaniid sa mga otoridad aron matino ang personahe luyo niining iresponsableng binuhatan nga nabulabog sa seguridad sa maong kolehiyo.