Gipahibalo ni US President Donald Trump nga ang Estados Unidos maghatag og giya sa mga barko aron makalabay sa Strait of Hormuz sugod niadtong Lunes.
Sumala sa US Central Command, ang military support naglakip og mga guided-missile destroyers, kapin 100 ka ayroplano, ug 15,000 ka mga sundalo.
Kini kabahin sa gitawag nga “Project Freedom” ni Trump, nga tumong nga mabawi ang kagawasan sa paglayag sa Strait of Hormuz.
Apan gipasabot sa usa ka US official nga dili kini usa ka escort mission.
Matud ni CENTCOM commander Adm. Brad Cooper, ang ilang suporta usa ka “defensive mission” nga importante alang sa regional security ug global economy, samtang padayon usab ang ilang naval blockade.
Nagpasidaan usab ang senior Iranian official nga si Ebrahim Azizi nga ang maong plano mahimong paglapas sa kasamtangang ceasefire.
Sa iyang Truth Social account, giingon ni Trump nga ang paggiya sa mga barko nagtumong sa pagpanalipod sa mga inosenteng tawo, kompaniya, ug mga nasod nga naapektuhan sa sitwasyon.
Gi-report usab niya nga adunay “very positive discussions” tali sa mga representante sa Amerika ug Iran, ug naglaum siya nga magdala kini og positibong resulta alang sa tanan.