Nanawagan ang AMANA BARMM kang Pangulong Ferdinand Marcos Jr. nga makigpulong kang MILF Chairman Al Haj Murad Ebrahim sa dili pa ang Oktubre 30, 2026, aron hisgotan ang pagkompleto sa nahibiling mga lakang sa kasabutan sa kalinaw.
Niadtong Oktubre 1, nagsulat si Murad sa Presidente aron mohangyo og panagtigom. Sumala kang Sultan Alim Saad Amate, convenor sa AMANA, kapin 14,000 ka kanhing MILF combatants ang naghulat pa sa pagdis-arma, apan wala pay naproseso sukad Hulyo 2024.
Matud sa grupo, ang Exit Agreement mao ang kataposang dokumento sa peace process nga kinahanglan pirmahan sa gobyerno ug MILF.
Gilauman sa AMANA nga ang pagkompleto sa proseso sa kalinaw makatabang sa pagdani og mga mamumuhunan, pagmugna og trabaho ug pagpalambo sa ekonomiya sa Mindanao.