Miabot sa dul-an usa ka milyon ka pesos ang kinatibuk-ang danyos human gilaraw sa kalayo ang duha ka panimalay sa managlahing dapit sa Valencia City kaganihang gabii, diin usa usab ang natalang naangol.
Sa pakighinabi sa Bombo Radyo Malaybalay ngadto kang FO1 Niko C. Puno, ang Fire and Arson Investigator sa Valencia City Fire Station, gibutyag niini nga unang miulbo ang kalayo pasado alas 6:50 sa gabii sa usa ka ancestral house didto sa Purok 2, Barangay Lumbayao. Gipanag-iyahan ang maong balay ni JP Capio diin gideklara kining fully engulfed na sa pag-abot sa mga bombero. Base sa inisyal nga imbestigasyon, posibleng nagsugod ang kalayo sa ikaduhang andana tungod sa mga wire sa atop bisan pa og lima na ka bulan nga walay kuryente ang balay. Ang danyos sa maong dapit gibanabana nga mitala sa ₱97,500.
Nasundan ang maong insidente pasado alas 10 sa gabii sa dihang nasunog usab ang usa ka balay ug boarding house sa Purok 15, Barangay Poblacion. Giangkon sa tag-iya nga si Jose Ranilo Yanzon nga posibleng nagsugod ang kalayo sa iyang gihalingan nga nalimtan og palong. Nasunog ang maong establisyemento diin nadamay usab ang duha ka mga boarders. Naangol si Yanzon human makaangkon og first-degree burns ug dali nga gitambalan sa mga responders. Ang danyos sa ikaduhang sunog gibanabana nga mikabat sa ₱810,000.
Sa pagkakaron, padayon pa ang gihimong imbestigasyon sa Bureau of Fire Protection (BFP) aron masuta ang pinal nga hinungdan sa maong mga sunog.