Nagpaalim karon sa balay-tambalan ang usa ka lalaki human kini gidunggab sa dughan atol sa selebrasyon sa pista ug disco activity sa Sitio San Vicente, Barangay Gandingan, Pangantucan, Bukidnon, niadtong milabayng adlaw. ( April 24, 2026)
Base sa report gikan sa Pangantucan Municipal Police Station, parehong ubos sa impluwensya sa makahubog nga ilimnon ang biktima ug ang suspek sa dihang nahitabo ang krimen pasado alas 11:00 sa gabii. Kalit lang matud pa nga giatake sa suspek ang biktima ug gidunggab kini kausa sa iyang dughan gamit ang usa ka kutsilyo. Bisan pa man sa iyang seryosong samad, nakahimo pa sa pagbalos ang biktima diin iyang nahapakan og bato sa ulo ang suspek.
Tungod sa naangkong mga samad sa duha, daling gidala ang biktima ug suspek sa Pangantucan Medical Hospital apan sa ulahi gi-refer ngadto sa Bukidnon Provincial Hospital sa Maramag alang sa dugang pagpaaliml. Narekober sa mga otoridad sa dapit nga nahitaboan ang usa ka kutsilyo nga duna pa’y dugo nga maoy gigamit sa pagpanunggab.
Personal nga panagbangi ang gilantaw karon sa kapulisan nga motibo sa maong insidente. Sa pagkakaron, ang suspek anaa na ubos sa hospital arrest samtang gihikay na ang tukmang kaso nga ipasaka batok kaniya.