Usa ka 40-anyos nga lalaki gikan sa Taiwan ang nakasinati og medikal nga krisis human sa pagbisita sa Ferrari World sa Abu Dhabi.
Human misakay sa usa ka high-speed roller coaster, nakasinati kini og pagkalipong, apan gipasagdan lamang kini ug gibaliwala.
Pag-abot niini balik sa Taiwan, nagsige na og balik-balik ang grabeng sakit sa ulo niini hangtod nga niabot ang punto nga kalit lang kining natumba ug gidali pagdala sa ospital.
Didto na-diagnose ang lalaki nga adunay brain hemorrhage o pagdugo sa utok.
Sumala sa mga doktor, dako ang posibilidad nga ang grabeng puwersa sa roller coaster maoy hinungdan sa maong pagdugo.
Hinuon, giklaro sa mga eksperto nga talagsaon ra kaayo kini nga mahitabo sa usa ka himsog nga tawo.
Kasagaran, ang mga biktima niini aduna nay daan nga risk factors sama sa alta presyon (high blood pressure) o kaha natural nga kahuyang sa mga ugat sa utok nga wala lang mamatikdi sa sayo pa.
Ang maong hitabo nagsilbing pahimangno nga dili angay balewalaon ang bisan unsang sintomas sa sakit sa ulo human sa usa ka extreme ride.