Balhog sa bilanggoan ang usa ka lalaki human kini makuhaan sa kapin ₱14-K nga kantidad sa gidudahang shabu sa gikasang buy-bust operation didto sa Purok 7, Barangay Norte, Don Carlos, Bukidnon, niadtong Hulyo 12, sa alas-9:30 sa buntag.
Giila ang dinakpan nga usa ka 35-anyos nga lalaki nga gikonsidera sa mga awtoridad nga usa ka street-level drug personality. Sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, ang malampusong manhunt operation gipangunahan sa Don Carlos Municipal Police Station ubos sa pamunoan ni PMAJ Al-Nico R. Haman, kauban ang 2nd Bukidnon PMFC ug Bukidnon Provincial Intelligence Unit (PIU).
Narekober gikan sa posisyon sa suspetsado ang upat ka pakete sa gidudahang shabu nga motimbang og 2.20 gramos ug adunay Standard Drug Price (SDP) nga nagkantidad og ₱14,960.00. Lakip sa gisakmit sa mga operatiba ang usa ka basyong pakete sa sigarilyong Commando nga gihimong sudlanan sa kontrabando ug ang ₱500 bill nga gigamit isip buy-bust money.
Kasamtangan nang nagtingkagol sa kustodiya sa Don Carlos MPS ang suspetsado samtang giandam na ang mga kasong pagsupak sa Section 5 ug 11 sa Republic Act 9165 o Comprehensive Dangerous Drugs Act of 2002 batok kaniya. Ang mga narekober nga ebidensya gidala na usab sa Bukidnon Provincial Forensic Unit alang sa qualitative ug quantitative examinations.