KITAOTAO, BUKIDNON — ₱20-K nga shabu, narekober human malampusong nadakpan ang usa ka 20-anyos nga bag-ong giilang drug personality sa gikasang drug buy-bust operation didto sa Purok 6, Poblacion, Kitaotao, Bukidnon, niadtong kagahapon sa kadlawon, Hulyo 12.
Sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, nahitabo ang pagdakop pasado alas-1:51 sa kadlawon pinaagi sa hiniusang pwersa sa Kitaotao Municipal Police Station ubos ni PMAJ Jose Regner Sevilleno, kauban ang 2nd Bukidnon PMFC ug Provincial Intelligence Unit (PIU).
Tulo ka gramo sa gidudahang shabu nga nakasulod sa unom ka pakete ang nakumpiska gikan sa suspetsado, diin aduna kini Standard Drug Price (SDP) nga nagkantidad og ₱20,400.00. Lakip sa narekober ang usa ka libo ka pesos nga buy-bust money ug usa ka basyong pakete sa sigarilyo nga gigamit nga sudlanan sa kontrabando.
Balhog na karon sa kustodiya sa Kitaotao MPS ang maong batan-on alang sa saktong disposisyon samtang ginaandam na ang mga kasong pagsupak sa Section 5 ug 11 sa Republic Act 9165 o Comprehensive Dangerous Drugs Act of 2002. Ang mga nakumpiskang ebidensya gidala na usab sa Bukidnon Provincial Forensic Unit alang sa laboratory examination.