Girekomenda na sa Sangguniang Panlalawigan sa Bukidnon ang hingpit nga pag-aproba sa duha ka lokal nga ordinansa nga nagtumong sa pagwagtang sa mga panagbangi sa yuta sa Cabanglasan ug pagpauswag sa transportasyon sa lungsod sa Lantapan.
Sa gipahigayon nga sesyon, gipresenta ni Second Legislative District Board Member Bobby Jay Dinlayan ang komite report nga nagpabor sa Ordinance No. 47-2026 sa Cabanglasan. Pinaagi sa maong balaodnon, magtukod og usa ka comprehensive municipal framework aron husayon ang mga land dispute o away sa yuta pinaagi sa malinawong mediation sa barangay level, inabagan sa mga importanteng ahensya sama sa DENR, DAR, LRA, NCIP, ug PNP aron masiguro ang hapsay ug baratong resolusyon alang sa mga residente.
Sa pikas bahin, gipaburan usab sa komite ubos ni Board Member Larry Unahon ang Ordinance No. 296 sa Lantapan nga mag-aproba sa dugang prangkisa alang sa mga motorized tricycle ug trycab for hire. Ubos sa maong ordinansa, pasakahan ngadto sa 750 ka units gikan sa kasamtangang 500 ang tugotang bumiyahe sa lungsod aron matubag ang panginahanglanon sa mga sumasakay, dungan sa pag-amenda nga himuong usa ka tuig na lamang ang lugway sa pag-renew sa mayor’s permit alang sa mga operators.