Nakatala ang Philippine National Police (PNP) og 28 ka kaso sa vote buying sa tibuok Pilipinas hangtod sa adlaw sa eleksyon niadtong Mayo 12. Base sa report sa national police, sa 28 ka insidente sa vote buying, 68 ka indibidwal ang giila nga nalambigit sa maong kalapasan.
Sa maong mga kaso, 19 ang naaresto, samtang 22 pa ang gipangita pa hangtod karon. Sa kinatibuk-ang ihap, lima ka kaso ang wala pa masumite, usa ang nakapiyansa, walo ang naka-file na, walo usab ang na-dismiss, ug unom pa ang padayon nga giimbestigahan.
Sumala ni PNP Chief, Police General Rommel Francisco D. Marbil, tumong sa ilang hugot nga pagtutok sa vote buying ang pagtuman sa mando ni Presidente Ferdinand R. Marcos Jr. nga sumpoon ang pagpanikas sa piniliay ug masiguro kahapsay 2025 National and Local Elections.
Kadaghanan sa mga kaso sa vote buying nga natala kay gikan sa mga regional offices sa PNP. Gisiguro usab ni Gen. Marbil nga padayon ang ilang pagpaningkamot nga madakpan ug mapasaka og kaso ang mga responsable, bisan human na ang eleksyon.