25 ka tawo namatay sa pagkasunog sa usa ka cargo ship samtang ginaayo sa China

Namatay ang 25 ka tawo human nga nasunog ang usa ka foreign cargo ship samtang ginaayo sa usa ka dunggoanan sa sidlakang bahin sa China.

Nahitabo ang maong insidente sa dunggoanan sa Qingdao diha sa cargo vessel nga “Ocean Melody” nga nagdala sa bandila sa Liberia. Sa 42 ka tawo nga anaa sa sulod sa barko, 17 ang nagmalampusong na-evacuate, diin lima kanila ang nakaangkon og samad ug kasamtangang giatiman sa balay-tambalan.

Miabot sa kapin tulo ka oras ang paningkamot sa mga bombero sa pagpawong sa kalayo. Sa kasamtangan, nagpadayon ang imbestigasyon sa mga awtoridad sa China aron masuta ang eksaktong gigikanan sa maong trahedya.