Misaad ang Philippine Sports Commission (PSC) og dugang nga insentibo alang sa mga atletang Pilipino ug ilang mga coach nga mosabak sa 20th Asian Games ug 5th Asian Para Games sa Aichi-Nagoya, Japan kon malabwan nila ang upat ka medalyang bulawan nga naangkon sa nasod sa Hangzhou, China.
Gipahibalo ni PSC Chairman Patrick Gregorio atol sa send-off ceremony sa Rizal Memorial Coliseum nga makadawat usab ang matag atleta ug coach og dugang nga allowance nga P6,000. Sumala ni Gregorio, ang maong dugang nga pondo naggikan sa direktiba ni Presidente Ferdinand Marcos Jr. aron maghatag og dugang nga dasig sa nasyonal nga delegasyon.
Ubos sa Republic Act 10699, nakagahin na daan ang P2 milyon nga cash reward alang sa gold, P1 milyon sa silver, ug P400,000 sa bronze. Nagtuo ang namunoan sa PSC nga dako ang tsansa sa mga atletang Pilipino nga makakuha og mas daghang medalya karong tuiga.