Duha ka bag-ong giila nga drug personalities ang nasikop sa mga sakop sa Talakag Municipal Police Station Drug Enforcement Unit human sa gipahigayon nga buy-bust operation sa Sitio Babagiohan, Barangay Dagumbaan, Talakag, Bukidnon niadtong Abril 10, 2026.
Ang maong malampusong operasyon gipanguluhan ni PCPT Romeo M. Arcilla Jr., ang Officer-in-Charge sa Talakag MPS.
Ang mga dinakpan giila nga usa ka 33-anyos nga lalaki ug usa ka 31-anyos nga babaye, kinsa pulos mga residente sa Purok 3, Barangay Colawingon sa maong lungsod. Gawas sa ilegal nga droga, nakuha usab gikan sa posisyon sa mga dinakpan ang usa ka ilegal nga armas ug mga buhing bala.
Tungod niini, mag-atubang ang mga dinakpan og kasong paglapas sa Republic Act 9165 (Comprehensive Dangerous Drugs Act of 2002) ug Republic Act 10591 o ang Comprehensive Firearms and Ammunition Regulation Act.
Sa pagkakaron, ang mga suspisado anaa na sa kostodiya sa kapulisan alang sa saktong dokumentasyon ug ang pasaka nga tukmang kaso ngadto sa korte.